Published On: Mër, Shk 14th, 2018

Ndryshon menuja ushqimore në çerdhe, prindërit janë skeptikë

Menuja ushqimore e çerdheve dhe kopshteve të Tiranës ka ndryshuar. Në ditën e parë fëmijët janë përballur me shije të reja dhe disa prej tyre edhe nuk e kanë ngrënë ushqimin.

Mëngjesin e të mërkurës fëmijët kanë ngrënë trahana dhe jo të gjithë vogëlushët e kanë pëlqyer.

“Mëngjesi i të mërkurës ka qenë bukë me gjalpë, djathë dhe qumësht, u zëvendësua me trahana. Dreka tani e kanë me mish pule, spinaq, oriz, selino, majdanoz, vezë, karotë dhe mendojmë se këto ingredient janë shumë të shëndetshëm”, thotë Gentiana Bello, drejtoresha e çerdhes nr. 23.

Drejtoresha e kopshteve dhe çerdheve thote se menuja është përgatitur sipas rekomandimeve të OBSH për një ushqyerje të shëndetshme.

“Nga raportimet në të gjithë çerdhet ka pasur dhe fëmijë që nuk janë përshtatur por ata kanë qenë më pak se sa ne prisnim. Me pak durim do të mësohen”, thotë Zhaneta Muça për “Top Channel.

Dietologia Blerina Bombaj shpegon se si është përgatitur menuja. “Është konceptuar që më shumë se 2/3 e ushqimit të nevojshëm ditor të fëmijës të merren në kopësht, dhe brenda tyre të merret maksimumi i hekurit, i vitaminës C, folateve, vitaminës A, dhe të evitohen sheqeri i tepërt, evitohen yndyrnat e ngurta”, thotë Bombaj.

Pritet që pas Tiranës kjo menu të shpërndahet edhe në qytetet e tjera.

Ndërsa kuzhinieret thonë se tashmë ushqimet për fëmijët do të jenë më të pasura me vlera ushqyese.

Guzhiniere: “Supa për moshën 1-3 vjeç është me zarzavate, oriz, mishin e grirë, selino, majdanoz, spinaq, karrota me vezë dhe vajin e ullirit që është shumë i mirë, ekstra i virgjër. Çdo gjë na ka ardhur cilësore”

Menutë e çerdheve janë bërë 6-mujore, për të përdorur frutat dhe perimet e stinës.