‘Shqiptarët po ikin nga vendi’, Basha: Fajin e ka Rama -Albpress Daily News
Published On: Sht, Gus 26th, 2017

‘Shqiptarët po ikin nga vendi’, Basha: Fajin e ka Rama

Kreu i PD-së Lulzim Basha ka reaguar ditën e sotme lidhur me arsyet se përse shqiptarët gjithnjë e më shumë po braktisin Shqipërinë.

Përmes një statusi në profilin e tij në ‘Facebook’, Basha thotë se arsyeja kryesore se përse shqiptarët po largohen nga vendi është mungesa e mundësive dhe shpresës për një jetë më të mirë.

Për Bashën, fajin kryesor e ka kryeministri Edi Rama, i cili ka ‘veshur’ krimin me pushtet dhe ka mbushur Shqipërinë me drogë.

“Pse ikin shqiptarët; për këtë Rama nuk gjen kohë as të pyesë, dhe as të dëgjojë.

Ky është një kryeministër që nuk e bren ndërgjegja asnjë sekondë për faktin se braktisja e vendit është veprim i dëshpëruar nga mungesa e mundësive dhe e shpresës.

Shqiptarët ikin për të shpëtuar veten dhe fëmijët e tyre nga varfëria dhe injoranca; ikin për të shpëtuar nga droga dhe krimi që pasi pushtoi politikën, tani po pushton ekonominë duke u bërë kërcënim për pronën dhe jetën e çdokujt. Shqiptarët ikin nga vendi ku qeveria dhunon në mënyrë sistematike të pamundurit dhe të pambrojturit dhe favorizon e mbështet vetëm kriminelët dhe grabitqarët.

Rama vetë nuk është komentator, ai është në fakt përgjegjësi kryesor për eksodin masiv te shqiptarëve, për krimin e veshur me pushtet dhe për Shqipërinë e mbushur me drogë. Ndaj dita ditës po shtohen raportet dhe vendet europiane që tregojnë atë dhe qeverinë e tij me gisht për kanabizimin dhe kriminalizimin e vendit.

Vetëm të bashkuar dhe të vendosur për tu përballur me të keqen mund ta ndryshojme qeverisjen dhe jetën tonë. Shqipëria ka mundësi të mëdha për të gjithë, nëse qeveriset mirë”, shkruan Basha në profilin e tij në Facebook.