Një tjetër propozim vjen nga Gjermania/ Hapje negociatash me kusht… -Albpress Daily News
Published On: Mër, Qer 13th, 2018

Një tjetër propozim vjen nga Gjermania/ Hapje negociatash me kusht…

Hapje negociatash me kusht për Shqipërinë. Ky është propozimi i bërë nga ministry i Jashtëm i Gjermanisë, Heiko Mass, sipas të cilit Shqipëria ka bërë një reform në drejtësi shembullore.

Megjithëse Gjermania ende nuk ka një vendim nëse duhet ose jo të happen negociatat me Shqipërinë në fund të qershorit, propozimi i Mass është i ndërmjetëm, mes skeptikëve që shprehen kundër hapjes duke renditur mospërmbushjen e kritereve, dhe mbështetësve që janë në favor të hapjes.

“Disa shtete kanë bërë përparim të mirë, të tilla si ish-Republika Jugosllave e Maqedonisë, ku kanë luftuar për të gjetur një zgjidhje për çështjen e emrit në ditët e fundit. Por, edhe Shqipëria, përmes një reforme gjyqësore shembullore. Prandaj unë jam shprehimisht në favor të hapjes me kusht të negociatave të pranimit me këto dy vende”, deklaroi ministri i Jashtëm i Gjermanisë.

Kryediplomati gjerman nuk përmend se cili, apo cilët do të jenë këto kushte, por në disa media ka qarkulluar lajmi se mund të çelen negociatat, por bisedimet për kapituj konkretë do të fillojnë vetëm kur të vihet re progresi në prioritet e vendosura nga Brukseli.

Maas foli këtë të mërkurë në forumin e organizuar nga Fondacioni gjerman “Schëazkopf”, në bashkëpunim me fondacionin “Pulse of Europe”, ku kryefjalë ishte “Kurajo për një Europë të bashkuar”.

Ai përmendi në fjalën e tij edhe rrezikun që i kanoset rajonit nga fuqi të treta nëse BE ngurron që të qartësojë të ardhmen europiane të Ballkanit Perëndimor.

“Nëse BE-ja dështon për të patur progres në procesin e anëtarësimit me këto vende, ajo do të ketë pasoja fatale. Tashmë janë fuqitë e tjera që nxiten në këtë boshllëk: Rusia, Kina, vendet e Lindjes së Mesme, të cilat kanë ide krejtësisht të ndryshme të rendit dhe stabilitetit krahasuar me europianët”, deklaroi kryediplomati gjerman.