Depërtimi i inteligjencës së Iranit alarmon Tiranën: muxhahidinët çohen në një vend sekret 20 km larg kryeqytetit -Albpress Daily News
Published On: Sht, Gus 19th, 2017

Depërtimi i inteligjencës së Iranit alarmon Tiranën: muxhahidinët çohen në një vend sekret 20 km larg kryeqytetit

Rreziku i depërtimit të shërbimeve iraniane për sigurinë e mbi 2 mijë muxhahidinëve opozitarë të Teheranit që ndodhen në Shqipëri prej dy vitesh, ka detyruar organet shqiptarë të marrin masa shumë të forta.

Një burim i rëndësishëm në një agjenci ligjzbatuese, i tha tesheshi.com se për arsye sigurie muxhahidinët do të zhvendosen nga ish-Universiteti Vitrina në një ish-bazë ushtarake 24 kilometra nga Tirana, vend i cili mbahet në sekret të plotë.

Megjithëse një pjesë e stafit të Frontit të Rezistencës iraniane vazhdon të punojë pranë City Park, kryesisht zyra e marrëdhënieve me publikun dhe propagandën, pjesa më e madhe e njerëzve do të largohen së shpejti.

Ditët e fundit janë ndaluar edhe seancat e përditshme të vrapit që kryenin meshkujt e opozitës iraniane, rreth 5 kilometra në ditë, nga City Park deri në Yzberish.

Ajo që ka alarmuar edhe më shumë autoritetet e Tiranës ka qenë edhe një letër që i ka mbërritur ministrit të Brendshëm në detyrë, Dritan Demiraj, nga një grup që e quan veten si “familjarë të disa opozitarëve” që ndodhen në Tiranë dhe kanë kërkuar që shteti shqiptar t’u krijojë mundësi për t’i takuar.

Kjo letër të cilën tesheshi.com e disponon si tekst, ka shkaktuar një alarm real dhe është konsideruar si një manovër tipike e shërbimeve inteligjente.

Letra ka vënë në lëvizje autoritet shqiptare të cilët kanë marrë në pyetje krerët e Frontit të Rezistencës iraniane, duke u thënë se “a prisni familjarë këtu?”.

Pikërisht kjo kërkesë ka tronditur edhe më situatën, pasi muxhahidinët kanë deklaruar se këto janë metoda tipike të përdorur edhe në kampin Ashraf në Irak, ku kështu janë vrarë shumë prej opozitarëve.

Si masë është marrë urgjentisht largimi i tyre nga Tirana. Deri tani vendqëndrimi i muxhahidinëve do të mbahet sekret.

Nga ana tjetër, mësohet se Këshilli i Rezistencës ka përgatitur një përgjigje zyrtare ndaj autoriteteve shqiptare, përkatësisht ndaj ministrit të Brendshëm, Dritan Demiraj.

Ndërkaq, në letrën që të ashtuquajturit “pjesëtarë të familjeve të opozitarëve” i kanë dërguar Demirajt, akuzohen krerët e opozitës se “ndalojnë mbështetësit e tyre që të kontaktojnë me familjarët”.

Sahar Family Foundation është një organizatë që pretendon se mbledh brenda saj disidentët e opozitës zyrtare iraniane, por nga ana tjetër opozita i cilëson ata si vegla të regjimit.

Në letrën e Sahar Family Foundation drejtuar ministrit të brendshëm shqiptar, thuhet:

“Kohët e fundit, Maryam Rajavi – udhëheqësja de facto e kultit pas zhdukjes së Massoud Rajavi – bëri përsëri një udhëtim në Shqipëri për të penguar anëtarët që të largoheshin. Në një takim, ajo në mënyrë implicite i kërcënoi ata që duan të largohen. Ne e dimë se ardhja dhe largimi i saj nga Shqipëria është rregulluar për të shmangur procedurat e kontrollit të pasaportave në aeroport. Gjatë vizitës së Rajavi, znj. Elona Gjebrea, zv / ministrja e Punëve të Brendshme përgjegjëse për luftën kundër trafikimit, mori pjesë në një mbledhje kulti dhe shprehu mbështetjen e saj të plotë për grupin terrorist”.

Një ekspert i njohur i sigurisë i tha tesheshi.com se gjuha e përdorur dallon qartë se është tipike diversion pasi flet me po atë stil që përdor qeveria aktuale në Iran që i quan muxhahidinët si “terroristë”. Ndaj dhe duhet trajtuar si e tillë, thekson eksperti.

Mirëpo situata ka shkaktuar mjaft shqetësime edhe për kreun e Frontin e Rezistencës, Mirjam Rajavi, e cila një ditë vjen në Tiranë e një ditë shkon në Paris për të treguar se nuk është zhvendosur plotësisht.

Vetëm dy ditë më pare, u mbajt një mbledhje në kryeqytetin francez në përkujtim të vrasjes së 30 mijë muxhahidinëve në vitin 1988, ku në dekorimet e tavolinave është shkruar “Paris 17 gusht 2017”, për të treguar në Iran se akuzat e qeverisë së Teheranit ndaj opozitës nuk qëndrojnë.

Ndërkohë, në faqet e sitit të FNR, pra muxhahidinëve, jepet vazhdimisht lajme mbi zhvillimet në Iran, kryesisht për të burgosurit që ata i cilësojnë si politikë.

Ndërkaq në letrën e të ashtuquajturve familjarë drejtuar Dritan Demirajt, akuzohet rëndë qeveria shqiptare se po shkel të drejtat e atyrë që duan të largohen nga Shqipëria pasi nuk i lejojnë.

“Fatkeqësisht, ne jemi dëshmitarë të sjelljes brutale të qeverisë dhe policisë shqiptare ndaj familjeve. Familjarёt vijnë në Shqipëri për të vizituar të dashurit e tyre. Nё asnjё vend tё botёs nuk konsiderohet krim vizitimi i tё dashurve tё familjes, ndёrkohё qё nё vendin tuaj familjarёt e anёtarёve tё kultit Rajavi pasi janё pёrzёnё e rrahur nga kulti e nuk janё lejuar tё takojnё tё afёrmit e tyre, policia e vendit tuaj i ka marrё nё pyetje dhe i ka trajtuar si tё ishin kriminelё”, theksohet në letër.

Është ky pra një dokumenti i cili ka alarmuar jo vetëm Tiranën por edhe shërbimet partnere, që këto ditë kanë shtuar ndjeshëm praninë e tyre në Shqipëri. /tesheshi.com/